Ich Ludweick zu den zeiten pharrer zue Hietzing vergich offenleich mit dem prieff fur mich und mein nachchomen umb das chrewcz daz der Erber man Hanns auf der Saewl purger zue Wienn dem got genad zue meiner chirichen geschafft hat durch seiner selhail willen und da pey beleiben sol und do von mit chainerlay sachen entzogen werden nuer daz ez pey der chirichen beleiben sol also beschaidenleichen daz ich und mein nachchomen alle jar jerleich zwo sel mess sprechen oder singen sullen in den achtagen nach Sand Agnesen Tag und auch umb des vor genanten Hannsen sel pitten als der chirichen gewonhait ist darueber verpind ich mich allez daz stet zu haben und zue vol furen daz vor geschriben stet geschech des nicht so sullen sich die geschefftherren des chrewcz underwinden und geben wo sy hin wellent des verpind ich mich hintz den geschefft-herren als sy her nach benant sind Von Erst hintz dem Erbern vestten Ritter her Niclasen dem Wuerffel und hintz Pawlen dem Wuerffel seim prueder und hintz Niclasen dem Flustharten Mit urchuend des prieff versigelt mit meim anhangenden Insigel Der geben ist zue Wienn Nach christi gepurt drewtzehenhuendert jar Darnach in dem ain und newntzigesten jar zue unser frawen tag der liechtmess.

Source Fulltext: Peter Peusquens