Ich Peter der Guntzpurger diezeit des Rats der Stat ze Wienn und ich Kathrey sein hawsfrawe. Wir vergehen und tun chunt allen den, die den brif lesent oder horent lesen, die nu lebent und hernach chunftig sind, das wir mit gutem willen, mit verdachtem mut und mit gesambter hannt zu der zeit da wir es wol getun mochten. Und mit hannden hern Michels des Gaewchramer, zu den zeiten purgermaister und muenzz-maister und des Rats gemayn der Stat ze Wienne . Recht und Redleichen verchawfft und gegeben haben unser haws an einem tail gelegen an dem Newen-markcht ze Wienne zenest der Geystleichen herrn haus von dem heiligengeyst, und mit dem andern tail in der kernerstrazz zenest Philipps seligen haws des chaltenweyns mit allen den nutzen und rechten als es unversprochenleich von alter in purkchrechts gewer herchomen ist . Umb drewhundert phunt und umb fuenf und viertzig phunt wienner phening der wir gantz und gar verrichtet und gewert sein . Der Erbern frawn frawen Margreten, Symons des Abels seligen von Nasen witiben . die dasselb haws witiben weyse umb ir aygenhaffts ledigs varund guts gechawfft hat ir und irn Erben, oder swem Si es schafft macht oder geit, furbaz ledichleichen und frey-leichen zuhaben und allen irn frumen damit zeschaffen verchawffen versetzen, schaffen machen und geben wem Si wellen, und allez das danit tun und hanndlen, daz In allerpest wolchome und fuge vor aller irrung . Und zu einer pezzern sicherhait, so setzen wir uns obgenanten ich Peter der Guntzpurger und ich Kathrey sein hawsfrawe, mitsambt unsern Erben unverschaidenleich uber das egenant haws, der vorgenanten frawn Margreten und irn Erben oder swem Si es schafft macht oder geit, als vorbeschaiden ist, zu rechten gewern und scherm fur alle ansprach als purkchrechts recht ist und der Stat recht ze Wienne . Waer aber daz si an demselben haws furbas icht chrig oder ansprach gewunnen von swem daz wer mit recht oder ob In mit recht daran icht abgieng . Swas Si des schaden nement, das sullen wir In alles ausrichten und widerchern an allen irn schaden . Und sullen auch Si das haben, auf uns unverschaidenleich, und auf allem unserm gut daz wir habenin dem Lannde ze Oesterreich, oder wa wir es haben wir sein lebentig oder tod . Und daz der chawf furbaz also stet und untzerbrochen beleybe . Daruber so geben wir In den brif zu einem warn urchund, und zu einer ewigen vestnung der sach versigillten mit unserm Insigil und mit der Stat GruntInsigil ze Wienn . Das die herrn des Rates zu einer warn bestetigund des vor-geschriben chawfs durch unser fleizzigen pet willen an den brif gehangen habent . Der geben ist ze Wienne Nach Christi gepurd drewtzehenhundert jar darnach in dem zway und Newntzigistem jar an sand Ulreichs Abende.

Source Fulltext: Peter Peusquens