Ich Hanns von Mezzenpach und ich Anna sein housvrow und alle unser Erben, Wir vergechen offenleich mit dem brief, das uns unser lieber sweher, her Niclas der Wurffel, mein egenanten Annen vater, verricht und betzalt hat ffumf hundert phunt wienner phening an den Tausend phunten wienner phening So er uns schuldig ist Nach der Spruch brief sag die zwischen uns daruber sint, und sagen auch wir und alle unser Erben, den vorgenanten unsern Swehêr heren Niclasen den Wuerffel und sein Erben, der vorgenanten funf hundert phunt an den egenanten Tausent phunten gaentzleich ledig und los. Mit urchund des briefs, besigilten mit mein ob-genanten Hannsen von Messenpach, anhangundem insigil und mit des erbern manns insigil Michels des Gawkramer ditzeit Purgermaister und Munzzmaister ze Wienn, den wir des gepeten haben, das er der sach getzeug ist mit seinem anhangunden insigil, Im an schaden. Der brief ist geben ze Wienn, nach Kristes gepuert drewtzehenhundert jar darnach in dem drew und Neuwtzgistem jar, des nechsten Montags vor Mittervasten.

Source Fulltext: Peter Peusquens