Ich mayster Thoman der Smyd purger ze Wienne und ich Agnes sein hawsfrawe Wier vergehen offennleich mit dem brief. Umb die zway phunt wienner phenning geltes purkchrechts die wier verchaufft haben auf unserm haws gelegen bei den predigern ze Wienn zenegst Niclas haws des Rostawscher, umb Sechtzehen phunt wienner phenning, der wier gentzleichen verrichtet und gewertt sein zu der ewigen messe der her Linhart der Urbetsch rechter lehenherre ist, die fraw Elzbet, Hannsen witib von Ybs den baiden got gnade auf der zwelifpoten altar hintz sand Stephann ze wienne gewidempt und gestifft hat, als der brief lauttet, den wier besunderleich darumb gegeben haben. Haben wir uns mit unsern trewen angeverde gegen der egenanten ewigen messe, kapplen und verwesern verlubt und verpunden und verpinden uns auch gegen In mit disem gegenburtigen brif Also wenne daz ist daz wier die vorgenanten zwar phunt wienner phenning gelts purkchrechts auf dem vorgenanten unserm haws wider abchauffen wellen daz wir das nicht anders tun sullen, denne nur miteinander mit Sechtzehen phunden wiener pheningen und den nagsten dinst damit raichen und geben sulln der denn davon zenegst zugeben gepurt an alles vertzichen. Und wann wir selber nicht aygens Insigils haben daruber so geben wir In den brief zu einem warn offenn urchund der sach versigillten mit der zwair erbern mann Insigillen Paulen des Pewrberger und Andres von der yglaw purger ze wienn die wir des gepeten haben daz si der sach getzewgen sind mit iren Insigillen In an schaden, darunder wir uns verpinden mit unsern trewen angever, alles daz stetzuhaben das vor an dem brif geschriben stet, der geben ist Nach Kristi gepurd drewtzehenhundert jar, darnach in dem vier und Newntzigistem jar, des Nagsten Eritags vor sand Jacobs tag des heiligen zwelifpoten.

Source Fulltext: Peter Peusquens