Wir Albrecht von gots gnaden, Hertzog ze Oesterreich, ze Steyr, ze Kêrnden, und ze Krain, Grave ze Tyrol etc. Bechennen, daz fur uns kom, Niclas der Huendlêr, und gab uns auf, viertzehen phunt phenning geltes, und vier mutt waytz dienstes, die man von dem urfar zu Utzsee iaerlich dient, unsrer lehenschaft. Und pat uns fleizz(ichleich), daz wir die geruchten ze verleihen unserm getrewn Joergen von Nicolspurg, unserm Burger hie ze Wienn, wan Er Im die hiett zekauffen gegeben. Das haben wir getan, und haben demselben Joergen, die obgenanten phenning guelt, und den waytz dienst, verlihen, und verleihen auch wissentleich mit dem brief, was wir Im daran zerecht verleihen suellen und muegen. Also daz er und sein Erben die mit aller zuogehoerung, nu fuerbazzer von uns und unsern Erben, ynnhaben und niessen suellen in lehens weis als lehens und landes recht ist, an gevêrd. Mit urchuend ditz briefs. Geben ze Wienn an Eritag nach sand Joergen tag. Nach Christi gepurd drewtzehenhundert Jar, darnach in dem fuenfundnewnzigistem Jare. dominus dux, dominus cancellarius ad relacionem Zürher, aurifabri.

Source Fulltext: Peter Peusquens