Ich Michel der Hofmendel von Grispachersveld und ich Gedrawt sein hawsfraw und alle unser Erben wir vergehen offenleich mit dem brief das wir unverschaidenleich gelten sullen dem erbern Ritter hern Niclasen dem Wurffel und seinen Erben zechen phund wienner phening der wir Si unvertzogenleich richten und weren sullen an sand Merteins tag der schirist kuempt Tun wir des nicht Swas si denn derselben phening furbas schaden nement Es sey mit nochraisen mit potschafft mit zerung ze christen und ze juden oder wie der schad gnant ist das ainer pey sein trewn gesagen mag der den brief zaigt denselben schaden mit sambt dem hawbtgut sullen wir In gentzleich ablegen und widercheren Das luben wir In zelaisten mit unsern trewn angever Si sullen auch hawbtgut und schaden haben auf uns unverschaidenleich und auf allem unserm gut das wir haben in den lannden ze Osterreich und ze Payern oder wo wir es haben in allen lannden ligund oder varund gut wie das genant oder wo das gelegen ist wir sein lebentig oder tod Wir luben In auch mit unsern trewn angever das wir Si umb das vorgenant gelt weder hintz hof noch hintz kammer noch an kain gewaltige hannd noch nindert alzwohin schaffen sullen noch das wir weder freyung noch freybrief wider Si gewinnen sullen noch das wir In mit chainerlay andern sachen wie die genand sind waigern noch vortzichen sullen noch das wir Si chain andre werung anpieten sullen denn das wir Si hawbtguts und schadens an alles furbot und an alle chlag nuer mit beraiten wienner pheningen selber richten und weren sullen als vorgeschriben stet Und wann wir selber aigens insigels nicht haben Doruber So geben wir In den brief ze ainem waren urchund der sach versigilten mit der zwaier erber mann insigiln hern Petreins des Guntzperger die zeit des Rats der Stat ze Wienn und Hannsen des Ratgeben purger daselbs, die wir des gebeten haben das Si der sach zewgen sind mit iren angehangen insigiln In an schaden Und verpinden auch uns mit unsern trewn angever under iren insigiln alles das stetzehaben und zelaisten das vor an dem brief geschriben stet Der geben ist ze wienn noch christi gepuerd drewtzehenhundert jar dornach in dem funffundnewntzigistem jare an sand Johanns obent ze Sunnbenten

Source Fulltext: Peter Peusquens