Wir Wilhalm von gotes gnaden Hertzog ze Oesterreich ze Steyr ze Kaernden und ze Krain Graf ze Tyrol etc. Bekennen daz wir, angesehen und betracht haben, die willigen und fleizzigen empt-zûgen dienste, die, uens, uenser getrewr, Larentz uenser Kamrer, langtzeit getrewleich getan hat, und auch noch fuerbazzer tuon sol, und mag. Und haben Im, dadurch, und auch von sundern gnaden, die wir, hintz Im haben, verlihen, und leihen auch mit krafft ditz briefs, unsern tail des werdes, hye bey wienn an der Tûnaw gelegen, mit aller seiner zuegehoerung, der, vormaln der von Tyerna ist gewesen, und den, Sy Hannsen von Lichtenstain von Nicolspurg dem eltaern verkaufft habent, und der, auch, darnach, von demselben Lichtenstainer, an die Hochgeborn fuersten, unser lieben vettern Hertzog Albrechten seliger gedaechtnisse, und Hertzog Albrechten seinen Sun, und an uns koemen ist. Davon so sol der egenant Larentz, uenser kamrer, und sein erben, den egenanten unsern halben tail, des obgenanten werdes, mit allen eren Rechten nuetzen guelten und andern zuegehoerungen, von unsern Bruedern, und uens, in lehens Rechten innhaben nuetzen und niezzen, als den, die obgenanten von Tyerna, und der Lichtenstainer, vormaln habent, inngehabt, und uens, davon gewaerttig und gehorsam sein, als lehenslaeutt, Irm herren pilleich tuend, und als Lehens und Landes Recht ist angevaerd. Mit urkuend ditz briefs. Geben ze Wienn an Eritag vor sand Simons und Judas tag der zwelfpoten nach Kristi gepuerd drewtzehenhundert jar und in dem fuemf und newntzigistem jare. dominus dux per se ipsum mandavit fieri.

Source Fulltext: Peter Peusquens