Den Erbern weisen, meinen lieben herren, dem Purgermeister, dem Richter, und dem Rat, der Stat ze Wienn, Embewt ich Pauls Tannquart burger ze Pazzaw, und ich Ann sein hausfraw, dew emaln het, Albrechten den Waising saeligen, unser willig dinst, lieben herren, wir lazzen ewr beschaiden wizzen, daz uns Peter Helffannt ewr Mitburger und dew Velebrunnerinn sein hausfraw, des geltz, des si uns schuldig sind gewesen, von des hauss wegen gelegen ze Wien bei dem Roten Turn, das in verchaufft ist ganntz und gar, ausgerichtet habent. Sagen und sprechen sew, und ir erben, des ledig los und Quitt fuer uns und unser erben an gever. Wanne wir von desselben Gelltz wegen hintz in, nichtz mer ze sprechen noch ze vodern haben, Davon pitten wir, ewer ersamcheit fleizzig, daz ir di Velebrunnerinn, und irn wirt sâligen in ewerm Statpuch haisset abtun, alls redlich und pillich ist, daz si mit ru furbas beleiben . daz wellen wir gern, umb ew, und di ewern dienen. Dez sennden wir ew, den Offen brief ze urchund besigelt, mit der erbern Hannsen des Alltchindtz, und Lienhartz des Zeller burger ze Pazzaw aufgedrukchten Insigeln, di wir darumb fleizzig gepeten haben, in und irn erben an Schaden, verpinden uns darunder mit unsern Trewen staetichlich, an gever. Der brief ist geben an Sand Laurentzen abent, Anno etc. Nonagesimo Sexto.

Source Fulltext: Peter Peusquens