Ich Jorig der Gerung von Nêwinchel und ich Elzbet sein hausfraw Wir vergehen und tuen kund Allen den die den brief lesend oder horent lesen Umb die vorflucht so wir von dem erbern vesten Ritter herrn Niclasen dem Wuerffel getan haben darumb er mich obgenanten Joergen in seiner vankchnuezz gehabt hat der er mich durch erber laewt vleizzigen pet willen begeben ledig und frey lassen hat, das wir obgenanten Ich Joerg Gerung und ich Elzbet sein hausfraw und all unser erben uns des gegen dem obgenanten hern Niclasen dem Wuerffel und gegen allen seinen erben mit unsern trewn an alles gevêr verlubt und verpunden haben luben und verpinden auch uns gegen In mit dem brief Also das wir noch all unser erben noch anderr unser frewnd dhainer fuerbas hintz dem egenanten hern Niclasen dem Wuerffel noch hintz allen seinen erben Noch hintz allen seinen laewten und guetern Noch hintz dem guet, das wir von Im zu Nêwinchel gehabt haben darauf wir gesezzen gewesen sein Und das wir Im unbedwungenleich und ledichleich aufgeben haben nymmermer chain zuspruch noch vodrung haben noch gewinnen noch chains rechtens darauf iehen sullen in dhain weg von der egenanten vankchnuezz noch von chainer vergangen sach wegen. Wêr aber das wir darueber wider Si icht têten es wêr mit worten oder mit werichen des wir mit einer warn kuntschafft ueberfarn wuerden So sullen wir dem vorgenanten hern Niclasen dem Wuerffel und seinen erben, vervallen sein zwaintzig phunt wienner phenning an alle widerred und sullen auch Si dieselben phenning haben auf uns unverschaidenleich und auf allem unserm guet das wir haben in den lannden ze Osterreich und ze Ungern oder wo wir es haben wir sein lebendig oder tod Und wann wir selber aigens Insigils nicht haben darueber so geben wir In den brief zu einem warn urchund der sach versigilten mit der zwayr erbern manne Insigiln herrn Chuenrats des Rokken dietzeit muenzzmaister ze Wienn und Niclas des Schêrnitzêr purger daselbs Die wir des vleizz(ichleich) gepeten haben das si der sach getzewgen sind mit iren angehangen Insigiln In an schaden Und verpinden uns auch mit unsern trewn angever under iren Insigiln alles das stêt ze haben und ze laisten das vor an dem brief geschriben stet Der geben ist ze Wienn nach Christi gepuerd drewtzehenhundert jar darnach in dem Siben und Newntzigisten jar an Sand Thomans Abenddes heiligen zwelifboten.

Source Fulltext: Peter Peusquens