Ich Jacob der Guenser Purger zue Wienn und ich Ann sein hawsfraw wir vergechen fuer uns und fuer all unser Erben und tuen chuend offenleich mit dem brief das wir mit gutem willen und mit wolbedachtem muet zue der zeit da wir es wol getuen mochten und mit unsers Gruntherren hannt des Erwirdigen herren hern Heinreichs Abbt des Goozhaws unser frawen datz den Schotten ze Wienn Recht und redleichen versatzt haben fur newn und Sechtzig phunt Wienner phenning unser haws gelegen in der Strawchgazzen zue Wienn ze naegst hern Hertleins haws des Losenstainer, da von man alle Jar dient hintz den Schotten ze Wienn ain und Achtzig wienner phenning ze Gruent-recht und vier phunt wienner phenning ze purchrecht und nicht mer die man geben und raichen schol derm Erbern herren hern Hansen die zeit Chapplan uenser frawen alter gelegen in der pharrchirchen datz Sand Stephan ze Tulln, und sind auch die egenanten newn und Sechtzig phunt her chomen von dem haws das ich und mein ererew hawsfraw fraw Katrey der God gnad mit-einander mit gesambter hannt gechauft haben und das mein leibgeding geb(w)esen wêr auch gelegen in der Strawchgazzen daselbs ze nêchst dem haws das weilnt Marcharts sêligen des hausleiter gewesen ist mit der w(b)eschaidenhait das ich vorgenanter Jacob der Gunser die egenanten newn und Sechtzig phunt wienner phenning auf meinem haws zenechst hern Hertleins haws des Losenstainer ze leibgeding ynnhaben niezzen und nuetzen sol unverchumbert untz an mein tod, und denn nach meinem tod So sullen die egenanten newn und Sechtzig phunt wienner phenning ledichleichen erben und gevallen auf mein und der egenanten meiner hawsfrawen Kathrein nachst Erben darauf Si denn ze recht erben und gevallen sullen an allen chrieg und daruber So geben wir In den brief zue einem warn urchund und gezeug der sach versigilten mit unserm Insigil und mit des egenanten erwirdigen Gruntherren Insigil Abbt Heinreichs datz den Schotten zue Wienn der das durch unserr fleizzigen pet willen zue einer warn getzeugnuzz der vorgeschriben sach an dem brief gehangen hat der geben ist ze Wienn nach Christi gebuerd Drewtzehenhundert Jar, dar nach in dem Acht und Newntzigistem Jare des nachsten Mitichens nach Sand Johanns tag zue Sunbenden.

Source Fulltext: Peter Peusquens