Nos Ladislaus dei gratia Rex Hungariae tenore praesentium signifi-camus quibus expedit universis, quod hansgravius rector mercatorum de vienna et de austria ad nostram accedens praesentiam exhibuit nobis patentes litteras domini Stephani illustris Regis Hungariae patris nostri karissimi felicis recordationis super confirmatione litterarum Regis Bele avi nostri karissimi petens humiliter cum instantia ut ipsas ratas habere et nostris litteris patentibus dignaremur confirmare, qua-rum quidem tenor talis est: Nos Stephanus dei gratia Rex Hungariae significamus universis presencium per tenorem, quod Sybridus dictus Loubul exibuit nobis litteras patentas karissimi patris nostri Regis Bele inclite recordationis petens ut ipsas confirmare dignaremur nostrarum patrocinio litterarum quarum tenor talis est. Bela dei gratia Rex Hungariae fidelibus suis comiti Jauriensi et tributariis de Jaurino de Abda et de Fyzegtu salutem et gratiam. Litteras venerabilis patris O. Episcopi Jauriensis super forma exigendorum tributorum in Jaurino de Abda et Fizegtu more antiquitus observato recepimus in hunc modum videlicet ut de quolibet curru teotonico veniente in Hungariam tributarii debent habere quatuor denarios et comes Jauriensis duos denarios regales. Item de curru transeunte de Hungaria tributarii debent habere octo denarios et comes duos. Item si venerint currus in navi cum mercimoniis de quolibet curru tributarii debent habere quatuor denarios et comes duos. Si vero navis ascendat cum mercibus, ipsa navis estimetur et redigatur ad quantitatem curruum et de quolibet curru tributarii habent octo denarios et comes duos. Item si teotonici boves superius deferant de quolibet bove duos denarios, et comiti unum denarium de duobus teotonicorum. Item de curribus hungaro-rum tributarii duos denarios et comes de duobus curribis hungarorum unum denarium habeat. Item de bobus ungarorum superius deferen-cium unum denarium de duobus bobus et de quatuor bobus comes unum denarium. Item de curru mellis tributarii debent habere tria pondera et comes unum pondus. Item de qualibet tunella vini tributariis octo denarios, et comiti duos. Item de curru salium ungaro-rum duos sales et dimidium cum porcione comitis Jauriensis. Item de centum marcis piperis, tributarii debent habere unam marcam piperis, et de centum ciroteciis duas cirotecas et sic de aliis minutis mercimo-niis. Item de curru hospitum latinorum unum fertonem. Item in Fizegtu de curru teotonicorum quantum cumque honeris habente unum denarium de reliquis autem mercimoniis bobus scilicet et aliis nichil dare tenentur in Fizegtu. Item teotonici pedites nichil dare debent. Item in abada de duobus curribus teotonicorum quatuor dena-rios unde fidelitati vestre mandantes precipimus firmiter et discrete quatenus ultra formam antiquitus observatam in tributis nichil exigere penitus presumatis, alioquin transgressores nostri mandati in rebus et persona graviter puniemus. Datum anno domini M° CC° LX°. Nos igitur petitionem eiusdem considerantes fore iustam et legitimam ad misimus presentibus confirmantes. Datum in Bykche anno domini M° CC° LXX°. Nos itaque considerantes petitiones dicti Hengraw superius nominati esse iustas et legitimas, quaerimoniam eiusdem regio admisimus cum favore, et praedictas litteras progenitorum nostrorum ratas habentes et acceptas, praesentibus de verbo ad verbum inseri faciendo patrocinio et munimine patentium litterarum nostrarum duximus confirmandas. Datum in Insula Cheth in octava beate Margarete virginis, anno domini M° CC° LXX° nono.

Source Fulltext: Peter Peusquens