Wir Wilhelm von gots gnaden Hertzog ze Oesterreich ze Steyr ze Kêrnden und ze Krain Graf ze Tyrol etc. Bekennen Als unser getrewer Hawnolt der Schuechler, unser Burger hie ze Wienn, nach unserm haissen und geschêffte, den Erbern, und weisen, unsern liebsten getrewen..dem Burger-maister, und..dem Rat ynnêrn und awzzêrn, unserer Stat hie ze Wienn, gêntzlich abgetreten und in geantwuortt hat, Herwarts auf der Sêwl sêligen kynder, mit aller irer hab, als er die auf ettlich Jar, die aber nu awz sind, von Mîcheln dem Gêwkramer und Uolreichen dem Zinken sêligen be-standen hett, daz wir maynem und ernstleich wellen, daz es fuerbas dabey gêntzlich beleibe, und ob den egenanten Burgermaister..den Rat, und die Statt ze Wienn von desselben Innhabens wegen..der vorgenant Gêwkramer oder yemand anderer, wie der genant wêr, icht bekuembern, oder In zusprechen wolten, daz Sy des gen Im und gen aller meniklichen suellen unentgolten sein, und beleiben. Wan wir Sy dabey vestikleich schiermen, und haltten wellen, vor allem gwalt und unrecht, Doch also, daz Sy, dieselben kyndêr, mit derselben irer hab, getrewlich ynnhaben, ver-wesen, und versorgen, ir yeklichs auf solich zeit und Jar, als unserr egenanten Stat ze Wienn Recht und gewonhait ist an gevêrde. Mit urkund dits briefs. Geben ze Wienn an Mêntag vor Allexii, Confessoris. Nach Kristi gepuerde dreutzehenhundert Jare, und in dem Acht und Newntzigistem Jare.

Source Fulltext: Peter Peusquens