Unsern frewntleichen dienst vor Wir lassen eur weishait wissen, daz fuer uns chomen sind in offenn Rat die erbern unser mitpurger Thoman der Haiden Chunrat der Rueber und der nimt sich an fuer sein hausfrawn frawn Lya, und Jacob der Haiden der egenanten frawn Lya prueder. Und derselb Chuenrat und Jacob die habent sich auch angenomen fuer Peterlein frawn Hester selig Sun des egenanten Jacobs swester Und habent uns furbracht und zewissen getan, von eins leib-gedings wegen So Piligreim der Snêtzel eur mitpurger innhat und daz herchomen ist von frawn Annen seiner hausfrawn selig darauf sew wartund sind Und habent allen iren gewalt an demselben leibgeding gentzleich vor unser aufgegeben den erbern iren lieben frewnden und mitterben Linharten dem Haiden und Erharten dem Haiden auch unsern mitpurgêren Swas dew damit verginnet oder hanndelt oder daraus machent, daz sey ier guetleicher wille an alles wider-sprechen an gevêr Und paten uns daz wir in des also ein urchund an euch gêben daz haben wir getan mit dem brief versigilten mit unserr Stat aufgedruktem Insigil. Geben am freytag in den Viertagen anno domini etc. LXXXX°nono. Der Rat in der Newnstat

Source Fulltext: Peter Peusquens