Ich Hainreich von Wirtzpurg der zingiezzer und ich Lutzey sein hawsfraw und ich Chunrat von Plaben der zingiezzer und ich Gedrawt sein hasfraw Wir vergehen und tun kunt allen den die brief lesent oder horent lesen das wir mit aller unserr erben gutem willen und gunst mit wol verdach-tem mut und mit gesambter hant zu der zeit da wir es wol getun mochten, und mit hannden hern Hannsen des Rogken zu den zeiten Burgermaister und des Rates gemain der Stat ze Wienn Recht und redleicher verchauft und geben haben dritthalb phund wienner phenning geltes purkchrechts auf unserm haws und garten daran gelegen in der Pyppingerstrazz ze Wienn zenêchst des Fugses haws des Melber, dem erbern herren hern Micheln die zeit kapplan der ewigen Messe die her Niclas selig der Wuerffel auf sand Sigmundes und sand Wolfganges Altar gelegen under dem lectorii datz sand Stephan ze Wienn gewidembt und gestifftet hat und allen seinen Nachkomen Chapplênen und verbesern derselben ewigen Messe Inne zehaben zenyzzen und zenutzzen als ander gult und guter die zu der egenanten ewigen Messe gehoerent, umb zwaintzig phunt wienner phenning der wir gantz und gar verrichtet und gewert sein und die herkomen sind von den dritt-halben phunden wienner phenningen geltes purkchrechts die, die vorgenant ewige Messe auf Jorgen haws des Eberperger, gelegen bey der hymelporten ze Wienn gehabt hat, mit der beschaidenhait, das wir alle die das vorgenant haws und den Garten daran Innhabent und besitzzent, In die egenanten dritthalb phunt wienner phenning geltes purkchrechts furbas alliar davon raychen und dienen sullen zu drien zeiten in dem jar an sand Michels tag ze Weychnêchten und an sand Jorgen tag zu einem ygleichem dienstag Sechs Schilling und zwainzig wienner phenning mit allen den nutzzen und rechten, als man ander purkchrecht in der Stat ze Wienn dient. Es ist auch dasselb purkchrecht wider abzechawfen wenn man das getun mag oder wil und darumb zeklagen wenn der dienst versezzen wirt nach der Stat recht ze Wienn. Wir sein auch mit sambt unsern erben unververschaidenleich der vorgenanten dritthalb phunt wienner phenning geltes purkchrechts auf dem egenanten Haws und dem Garten daran, Ir recht gewern und scherm fur all ansprach als purkchrechts recht ist und der Stat recht ze Wienn und was In mit recht daran abget das sullen Si haben auf uns unverschaidenleich, und auf allem unserm gut das wir haben in dem lande ze Osterreich oder wa wir es haben wir sein lembtig oder tod. und wand wir selber nicht aygner Insigil haben daruber so geben wir In den brief zu einem warn urkund und getzewg der sach versigilten mit der Stat GruntInsigil ze Wienn und mit des erbern manns Insigil hern Stephans des leyttner Burger ze Wienn den wir des fleizzichleichen gepeten haben, das er der sach getzewg ist mit seinem Insigil darunder wir uns verpinden mit unsern trewn an gever alles das gentzleich stet ze haben, das vor an dem brief geschriben stet, der geben ist ze Wienn Nach Cristi geburd drewtzehen hundert jar darnach in dem Newn und Newntzigisten jar an Eritag vor den Phingsten.

Source Fulltext: Peter Peusquens