Ich Hainreich der Zingiesser von Wiertspurg und ich Lutzey sein hawsfraw und ich Chuenratt von Plaben (Plauen) der zingiesser und ich Gedrawt sein hawsfraw, wir vergechen fuer uns und fuer all unser erben und tuen kund offenleich mit dem brief, umb die dritthalb phunt wienner phenning, geltes purkchrechts, die wir verchaufft haben auf unserm Haws und Garten daran, gelegen in der Pippingerstrazz ze Wienn ze nêchst des fuchs haws, des Melber. Dem erbern Briester hern Micheln dietzeit Capplan, und verb(v)esser der Ewigen Mess, die her Niclas sêlig der Wuerffel auf sand Sigmunds und sand Wolfgangs Altar gelegen under dem letter datz sand Stephan ze Wienn, Ge-widempt und gestifft hat und seinen Nachkoemen umb zwaintzig phunt wienner phenning der wir gantz und gar verrichtet und gewert sein, als der brief sagt den Si von uns darumb habent, daz wir uns mit unsern trewn angevêr, gegen demselben hern Micheln und gegen seinen Nachkoemen verlueppt und verpunden haben lueben und verpinden auch uens gegen In wissentleich mit dem brief. Also wenn daz ist daz wir dieselben dritthalb phunt gelts ab dem egenanten unserm haws und dem Garten dann wider abledigen wellen, das wir daz nicht anders tuen suellen denn nuer miteinander mit zwaintzig phunden wienner phenningen und den nachsten kuenftigen dienst damit der In dann davon ze dienen gevellet angevêr. und wann wir selber nicht aigner insigil haben, darueber so geben wir In den brief zu einem warn offem urchund der sach versigilten mit der zwair erbern Mann Insigiln, hern Pauln des Wuerffels und Hainreichs des Scheppachs, paid purger ze Wienn die wir des fleizzichleich gepeten haben das Si der sach getzewgen sind mit Iren Insigilen In an schaden. Daruender wir uns verpinden mit unsern trewn angevêr alles daz gêntz-leich stêtzehaben daz vor an dem brief geschriben stet. Der geben ist ze Wienn Nach Kristi gepuerd drewtzehenhundert Jar darnach in dem Nêwn und Nêwntzgistem Jar an dem heiligen Phingst Abent.

Source Fulltext: Peter Peusquens