Bonifatius episcopus servus servorum dei. Dilecto filio .. Antonio Preposito ecclesie Omnium Sanctorum in Wyenna Pataviensis diocesis Salutem et apostolicam benedictionem. Romanus Pontifex de cunctorum christi fidelium cuiu solicitus ad ea libenter intendit per que fideles ipsi reddi possint divine gratie aptiores. Dudum siquidem pro parte dilecti filii Nobilis domini Wilhelmi Ducis Austrie nobis exposito quod in Collegiata ecclesia Omnium Sanctorum alias dicta sancti Stephani Opidi sui Wyenne Pataviensis diocesis, quod notabilius ceteris Opidis et terris suis existit inextimabilis reliquiarum diversorum sanctorum multitudo per progenitores suos Duces Austrie collocata et miro auri et argenti ac lapidam pretiosorum ornatu decorata existunt, que quidam reliquie certis cuiuslibet Anni diebus populo publice ostenderentur ad quas videndas innumerabilis populi annuatim conflueret multitudo. Nos cupientes ut christi fideles ad visitandum ecclesiam et reliquias ipsas devotius venerarentur quo inibi maius animarum commodum et salutem se conspicerent adepturos de omnipotentis dei misericordia et beatorum Petri et Pauli Apostolorum eius auctoritate confisi omnibus christi fidelibus vere penitentibus et confessis qui in festivitate beate Catherine virginis et per duas dies ipsam festivitatem immediate sequentes ecclesiam et reliquias huiusmodi visitarent et ostensioni ipsarum reliquiarum interessent annuatim et ad conservationem ecclesie et reliquiarum huiusmodi manus porrigerent adiutrices illam indulgentiam et remissionem peccatorum auctoritate apostolica per nostras litteras concessimus quam ecclesiam sancti Marci de Venetiis Castellanensis diocesis in festivitate Ascentionis domini nostri Jhesu Christi annuatim visitantes quomodolibet consequuntur. Et nichilominus ut ipsi christi fideles ad ipsam ecclesiam Omnium Sanctorum in festivitate beate Catherine et duobus diebus predictis propterea confluentes indulgentiam huiusmodi uberius consequi possent Preposito dicte ecclesie Omnium Sanctorum pro tempore existenti et Octo aliis Confessoribus ydoneis per eundem Prepositum annuatim eligendis et in dicta ecclesia Omnium Sanctorum deputandis ut ipsi confessiones omnium et singulorum christi fidelium in festivitate beate Catherine et duobus diebus eam sequentibus huiusmodi causa huiusmodi indulgentie assequende confluentium in predictis beate Catherine festivitate et duobus sequentibus ac etiam aliis duobus diebus ipsam festivitatem precedentibus immediate eadem auctoritate audire et ipsis diligenter auditis pro commissis debitam eis absolutionem impendere valerent ac iniungere penitentiam salutarem nisi forsan talia forent propter que sedes apostolica esset merito consulenda eadem auctoritate de uberioris dono gratie per easdem litteras indulsimus prout in ipsis litteris plenius continetur. Cum autem sicut accepimus adeo ad huiusmodi ostensionem creverit christi fidelium devotio et tanta in dictis festo et diebus confluat ad dictam ecclesiam Omnium Sanctorum ipsorum fidelium multitudo, quod tu et Octo presbyteri huiusmodi ad audiendum ipsorum concessiones per huiusmodi duos ante et duos post ipsam festivitatem, et per ipsius festivitatis dies interdum commode non sufficiatis. Nos cupientes ut eo magis huiusmodi crescat devotio super hoc salubriter providere tibi et successoribus tuis Prepositis dicte ecclesie Omnium Sanctorum qui pro tempore fuerint eligendi et deputandi tot presbyteros ydoneos seculares vel religiosos quod pro tempore expediens fuerit qui per ipsam festivitatem sancte Catherine et etiam si expedierit per tres dies ante et per tres dies post festivitatem eandem confessiones christi fidelium huiusmodi audire et ipsis confessionibus diligenter auditis pro commissis debitam eis absolutionem impendere valeant et iniungere penitentiam salutarem nisi forsan talia fuerint propter que sedes predicta merito sit consulenda auctoritate predicta plenam et liberam tenore presentium concedimus potestatem. Datum Rome apud Sanctum Petrum IIII Nonas Junii Pontificatus nostri Anno Decimo. Gratis de mandato domini nostri pape. A. de Righa.

Source Fulltext: Peter Peusquens, Karlsruhe