Wir Leupolt von gots gnaden Hertzog ze Oesterreich ze Steyr ze Kernden und ze Krain Graf ze Tyrol etc. Tun kunt. umb das zuhaus das da stoesset an unser haus ze Wienn das des Gewkramers gewesen ist gelegen in dem Rotgêsslein, daz wir das unserm getrewn Chunraten unserm March-staller durch der getrewn dienst willen die er uns langtzeit her getan, und auch furbasser tuen sol gegeben haben und geben ouch wissentlich. In solicher mazz daz er damit seinen frumen schaffen mag mit verkouffen oder in anderweg nach seinem willen. Davon bitten wir die erbern weisen unser besunderlieben und getrewn..den Burgermeister..den Rate und die burger gemeinlich der Stat ze Wienn, daz Sy den egenanten unsern Marchstaller bey dem vorgenanten zuhaus halten und schirmen wan Sy daran gentzlich unsern willen tuend. Mit urkund ditz briefs. Geben ze Ensisheim an freytag vor sand Gallen tag Nach Christs geburd Drewtzehen hundert Jar, darnach in dem Newn und Newntzegistem Jare.

Source Fulltext: Peter Peusquens