Den erbern weisen..dem Burgermaister, dem Innern und dem aussern Rat der Stat ze Wyenn, unsern getrewn dienst, in frewntlicher gehorsam bevor, Erbern weisen und liben herren, als uens Ewr erwerge weishait, auz ewrm Innern und aussern Rat verschriben hat von wegen der newn muentz, daz haben wir wol vernomen, lassen wir ewr erberchait wissen, daz wir allenthalben, getracht, von wegen der selben muentz, und gedacht haben, und chuennen dar inn nichts anders, ytz versten, denn, Scholt si ainn gantzen furganch gewynnen, daz es dem lande, und lewten, kayn gemayner nutz nicht mueg gesein, Sunder ain ursach, verderblicher schaeden maenichlichs, und ain schadhafftz uebl, da von waer unser ger und will, daz si kainen fuerganch scholt gewynnen, waz aber dy hochgeporenn fuersten, unser lib genaedig herren mit ewch ueber aindlich, dar inn trachten, und tuen, daz landen und laewten gemainen nutz und frum bringet, des wellen wir gern gehorsam sein, und wellen auch, wann ez sich gepuert, gern dar zue tuen waz wir erenthalben, also daz wir unser trew und gewizzen, den der hochgeborenn unsrer genaedigen herschafft, icht verrukchen, pillich dar inn tuen schuellen und muegen. Geben Dorothee Anno etc. CCCCmo. Der Burgermaister und der Rat ze Egemburg, dy ewrn.

Source Fulltext: Peter Peusquens