Ich Margret die Chranfoglynn Burgerinn ze Wyenne Ich Kolman und Ich Jacob ir Suon und alle unser erben Bechennen offenlich mit dem brief, das wir mit guotem willen mit wolbedachtem muote zu der zeit da wir es wol getuon mochtten. Rechtt und redleich gegeben haben und geben auch wissentleich mit dem briefe, unserm getrewn dyener Lyepharten Zott von Regenspuorg durch der getrewn dyenst willen so er uns lanngtzeit getan hat, und auch hinfuor wol getuon mag, hundert phunt wyenner phenning, auf unserm dorff Rêgkendorf und auf seiner zuogehoerung wieso die benant ist, dartzuo suellen wir Im auch die kostt und Tysch geben die wyel er lebtt angevêr. Mit solicher underschaid, das derselb Lyephart die heiligen Briesterleichen weych em-phahen und Priester werden sol, und wenn er das also ausgerichtt und volpracht hat, So sol er denn fuorbas die egenanten hundert phunt phenning auf dem vorgenanten dorff und seiner zuo-gehoerung ledichleich haben und allen seinen frumen damit schaffen wie Im das allerpestt wol chuompt und fuogleich ist an allen krieg und irrsal. Wêr aber das Im daran icht abgieng, oder ob Im icht krieg oder zuospruoch daran auferstuonden, das suollen wir Im ausrichten und widerchern an allen seinen schaden und sol er das haben auf uons unverschaidenleich und auf allem unserm guot das wir haben in dem lannde ze Osterreich oder wo wirs haben, wir sein lebentig oder tod, und das dye sach fuorbas also stêt und untzerbrochen beleib, und wann wir selber aygner Insigil nicht haben, daruober so geben wir Im den brief zu einem warn urchund und getzeug der sach versigilten mit der zwair erbern mann Insigiln Lyenharts von Medling und Hannsen des Nêtzeuger bayd purger ze Wienn die wir des gepeten haben das Sy der sach getzeugen sind mit iren anhan-gunden Insigiln In an schaden. Daruonder wir uns mit unsern trewn verpinden alles das stêt ze haben das vor an dem brief geschriben stet. Geben ze Wyenne Nach Kristi gebuorde in dem virtzehenhundertistem Jar an sand Petronellen tage.

Source Fulltext: Peter Peusquens