Ich Frydreich von Tyrna vergich fur mich und fur all mein erben und tun kund offenleich mit dem brif das Ich von des gepots wegen so der edel und hochgeporn furst Hertzog Rudolff zelig ze Osterreich umb Gruntrechts und purkchrechts ablosung gepoten und auf gesatzt hat Recht und redleich abtzelosen gegeben hab der erbern frawn, frawn Kathrein der Newnmarkchterinn ze Wienn und Iren erben Ayn phunt wienner phenning geltes purkchrechts das Ich gehabt hab auf Irm haws gelegen In der Churbawnerstrazz ze Wienn zenechst der Veltspergerinn haws umb Acht phunt wienner phenning der Ich gantz und gar verrichtet und gewert pin Mit der beschaydenhait das Ich noch mein erben noch anders ymant von unsern wegen umb das egenant phunt gelts auf das vorgenant haws furbas nymermer chain ansprach noch vodrung haben noch gewingen sullen weder vil noch wenig. Wêr aber, ab furbas icht brif oder urkund vurbracht wurden von swem das wêr die umb das genant phunt gelts auf das vorgenant haws sagten dieselben brif und urkund alsverr sy dasselb purkchrecht beruerent sullen allerding tod und zenichtew sein und chain krafft mer haben weder chlain noch gros. Und daruber ze einem warn offem urkund und getzeug gib Ich In den brif versigilten mit mein egenanten Fridreichs Insigil von Tyrna und mit meines suns Insigel Jorgen von Tyrna den Ich des gepeten hab das er der sach getzeug ist mit seinem Insigil der geben ist ze Wienn nach kristes gepurde viertzehenhundert Jar darnach in dem drytten Jar des nachsten phintztags vor sand Gregorien tag des heiligen lerêr.

Source Fulltext: Peter Peusquens