Ich Margret Philipps seligen Witib des Kronvogel purgerinn ze Wyenn vergich und tun chuent allen den die den brief lesend oder hoerent lesen die nu lebend und hernach kunftig sind Das ich mit gutem willen mit wolbedachtem muet und mit gesuntem leib zu der zeit do ich es wol getuen mocht Recht und redleich geschafft hab und schaff wissentleich mit dem brief lautterleich durch got und durch trost und hails willen meiner Sel und des vorgenanten meins wirts und aller unserr vordern seligen selen zu der ewigen Mezz die ich gewidemt und gestifft hab auf sand Merten altar dats sand Stephan ze Wyenn mein haws gelegen hinder sand Niclas cappellen auf dem anger ze Wyenn ze nêchst Philipps haws des hantschuechster und Hundert phunt wyenner phenning auf dem dorf Reybestorff die ich darauf hab nach meins briefs sag Also beschaidenleich das das vorgenant haws und die selben hundert phunt phenning der egenanten Ewigen Messe fuerbas ewichleich zugehoern und da bey beleiben suellen einem iegleichen Chapplan der selben ewigen Messe ze haben ze besitzen ze nyessen und ze nuetzen als ander guelt und gueter die zu der selben Ewigen Messe gehoerent beruebkleich an alle Irrung und das das geschefft furbas also steet und untzerbrochen beleib Und wannd ich selber aygens Insigel nicht han darumb so gib ich dem erbern Priester hern Liepharten von Regenspurg yetzuend Chapplan der egenanten ewigen Messe und seinen Nachoemen und derselben ewigen Messe den brief zu einem waren urkuend und ze einer ewigen vestnung der sach versigelten mit der zwayer erbern Mann Insigel hern Lienhart von Medlikch die zeit des rats der Stat ze Wyenn und hern Chunrats des Hemmler dietzeit des aussern rats daselbs die ich des fleissichleich gepeten han, das si des geschêffts und der sach gezewgen sind mit Iren angehangenn Insigeln In an schaden und verbind mich auch mit meinen trewn angevêr under iren Insigeln alles das stêt ze haben das vor an dem brief geschriben steet Der geben ist ze Wyenn Nach kristi gepuerd viertzehenhundert Jar darnach In dem dritten Jar des Negsten Phintztags vor sand Pongrecen tag.

Source Fulltext: Peter Peusquens