Ich Hanns von Ebregassing purgêr ze Wienn vergich fuer mich und fur all mein erben und tun kund allen den die den brif lesent oder horent lesen das Ich mit gutem willen und mit wol-bedachtem muet zu der zeyt do Ich es wol getun mocht gar und gentzleich vertzigen und fuertzicht getan hab und vertzeich auch mich wissentleich mit dem brif gegen dem erbern mann Chunraten dem Greslein purgêr ze Wienn und frawn Margreten seiner hausfrawn und gegen Ir bayder erben meines halffentayl des hawses das wir miteinander gechaufft haben und sy auch den andern halffentayl desselben hawses gegen mir habent gelegen in der Preydenstrazz ze Wienn zenêchst Chunrats haws des Chelerschreyber mit der beschaydenhait das Ich noch mein erben noch anders ymant von unsern wegen darauf nymermer chain ansprach noch vodrung haben noch gewingen sullen noch dhaines rechtens darauf iehen sullen weder vil noch wenig, Sunder das der vorgenant Chunrat der Gresl, fraw Margret sein hawsfraw und Ir bayder erben sullen furbas das egenant haws gantzes ledichleich und freyleich haben und allen Iren frumen damit schaffen ver-chauffen versetzen und geben wem sy wellen an allen Irrsal, wann sy mir ein soleich gut darub gegeben haben das mich wol benuegt hat Und wann Ich selber nicht aygen Insigil hab daruber so gib Ich In den brif ze einem warn offem urkund der sach versigilten mit der zwayer erber mann Insigil hern Jorgen von Nikolspurgkch die zeyt des Aussern Rats der Stat ze Wienn und Ulreichs des Herwarts zu den zeyten Statschreyber ze Wienn die Ich des vleizzikchleich gepeten hab das sy der sach getzeugen sind mit Irn Insigiln In an schaden darunder Ich mich verpind mit meinen trewn angevêr alles das stêtzehaben das vor an dem brif geschriben stet Der geben ist ze Wienn nach kristes geburde viertzehenhundert Jar darnach In dem dritten Jar des nachsten mitichens vor dem heyligen Auffart tag.

Source Fulltext: Peter Peusquens