Ich Rudolff und ich Ludweig geprueder von Tyrna vergehen fuer uns unsrew Geswistreid und fuer alle unser erben und tun chund offennleich mit dem brief als weilent her Niclas der Wurffel selig und sein erben fur uns purgel und Selbgescholen sind gewesen hintz hern Ulr(eich)en von Wolffurt dar umb wir In unser haws an dem Liechtensteg ze Wienn under den fleischpenkchen ze negst Rudolfs des Angervelder haws zue ainem furphant gesatzt heten, das si mit unserm willen und wissen verkaufft und unser gelter davon betzalt habent das wir den erbern vestten Rytter hern Hanns den Wurffel und sein bruder Niclasen Ulreichen und Sygmund die Wurffeln und all ir erben des vorgenanten hawses und der Somm gelts darumb Si es verchaufft habent gentzleich quitt ledig und los sagen an alles geverd und ob das wer das In von uns unsern Geswistreiden und erben furbas von desselben haws oder der Somm gelts wegen darumb Si es verchaufft habent icht chriegs oder ansprach auferstund das schullen wir In alles ausrichten und richtig machen an allen iren schaden das luben wir In zue laisten mit unsern trewen an alles gever und schullen Si das haben auf uns unverschaidenleich und auf allem unserm guet das wir haben in dem lannde ze Osterreich oder wo wir es haben wir sein lebentig oder tod Und des ze urchund geben wir In den brief versigelten mit unsern paiden anhangunden Insigeln der brief ist geben ze Wienn nach Kristi gepurd virtzehenhundert jar darnach in dem dritten jar des nagsten freytags nach sand Margreten tag.

Source Fulltext: Peter Peusquens