Ich Barbara Hannsen Tochter des pyrprewer dem Got genad und Wolfharts hausfraw des Streithofer vergich offenleich mit dem brief das mich mein liebew mueter fraw Kristein weilent des egenanten meins vater selig hausfraw und yetzund Stephanns hausfraw des Pechrer verricht und gewert hat alles des guets das mich von dem egenanten meinem vater selig anerstorben und angerbt ist es sey erbguet oder varundguet wie das genant ist und sag auch ich die vorgenant frawn Christein mein mueter des egenanten mein vaterleichen erbtails gentzleich quidt ledig und los Also das ich noch mein erben furbas hintz der egenanten meiner mueter von desselben mein vaterleichen erbtail wegen nymermer chain ansprach noch vordrung haben sullen noch gewinnen in dhain weg Und wann ich obgenante Barbara selber aygens Insigel nicht hab Darueber so gib ich fuer mich und fuer mein erben der offtgenanten meiner mueter den brief ze einem waren urchuend der sach versigelten mit der zwayer erbern Mann Insigel Hainreichs des Verber und Jacobs des Paungartner baid puerger ze Wienn die ich des fleizzichleich gepeten han das si der sach gezeugen sind mit Iren angehangenn Insigeln In an schaden und verpind mich auch mit meinen trewn an gevêr under Iren Insigeln alles steet ze haben und ze laisten das vor an dem brief geschriben Der Geben ist ze Wienn Nach christi gepurd viertzehenhundert jar darnach in dem dritten jar des nechsten phintztags nach sand Michels tag.

Source Fulltext: Peter Peusquens