Ich Hanns von Ernspruen choerherr unser vrawn gotshaus ze newnbuerch klosterhalben Bechenn offenleich mit dem gegenbuertigen brief das ich awsgereicht und betzalt pin fumfund tzwaintzig phunt wienner phenning von Ulreichen Velenbrunner saeligen tachter wegen junchfrawn Kathrein die noch nicht vogtpaerig (mündig) ist und die mir ir obgenant vater schuldig ist gewesen und dor umb mir ze phant gesatzt ist ain haws gelegen ze Wienn an dem harmarcht gegen pawl ernsten padstuben ueber als das in dem statpuech ze Wienn geschriben ist Dasselbig vorgenant haws sag ich Hanns von Ernsprunn fuer mich und all mein erben umb daz obgenant gelt mit dem brief quit ledig und lozz versiglt mit meinem aufgedruckten petschad wann ich aigens insigels nicht enhab und durch pezzer Sicherhait willen So hab ich peten die tzwen erber mann Cirvosen den Tuetzen und Hannsen den Stekchen paid puerger ze newnburch das Sy ir insigel auf disen brief auch gedrueckt haben in baiden on schaeden Geben ze newnburch noch kristi purd virtzehenhundert jar dornoch in dem dritten jar am mittichen vor sand Cholmans tag.

Source Fulltext: Peter Peusquens