Ich Anna Hansen sêligen witib des Messenpekchen Vergich offenlich mit dem brief, das mich mein prueder Ulreich der Wuerffl verricht und getzalt hat fuenftzig phunt wyenner phenning an den hundert phunten, So er mir schuldig ist mit sampt den andern meinen pruedern Nach des geltbriefs sag und laudt den ich unverschaidenlich von In darumb han und sag Ich und mein erben den egenanten Ulreich den Wuerffel, meinen pruder der vorgenanten funftzig phunt phenning an der egenanten geltschuld und geltbrief so In zue seinem tayl anpueret gêntzleich quitt ledig und los Und wann Ich selber aygens Insigls nicht hab darueber so gib ich dem egenanten meinem prueder den prief zue einem waren urchuend der sach versigelten Mit der zwayer Erberr mann Insigeln hern Hawnolts des Schuhlêr und hern Albrechts des Zêtter dietzeit pait des Rates der stat zue Wyenn, die Ich des fleissiklich gepeten hab das sy der sach getzewgen sind Mit Iren ange-hangen Insigeln In an schaden. Daruender Ich mich mit meinen trewen angevêr verpind alles das stêt ze haben und ze laisten, das vor an dem brief geschriben stet Der geben Ist ze Wyenn Nach Cristi gepurd viertzehenhundert jar darnach in dem vierden jar des montags in der ersten vastbochen.

Source Fulltext: Peter Peusquens