Ich Peter der Angervelder zu den zeiten Statrichter ze wienn Vergich offenleich mit dem brief das fuer mich kom in die purgerschrann ze wienn do Ich sas an offem gericht Hanns Trosperkch von Nuernberkch und chlagt mit vorsprechen daz Im fraw Margret selig die Kronvoglynn gelten solt drew hundert und siben und sibentzig guter newr ungerischer guldein nach seins geltbriefs sag, der vor offem gericht gelesen und verhoert ward Nu wer dieselb fraw Margret, abgegangen mit dem tod, und wêr er des egenanten seins geltes alles noch ungericht und ungewert und davon hiet er fur daselb sein gelt in ein verpot genomen nach der Stat recht ze Wienn, der vorgenanten frawn Margareten haws gelegen bey sand Niclas kappellen auf dem Anger ze Wienn zenegst Philipps haws des hantschuechster und wer der erst darauf mit dem verpot und pat darumb gerichts daz veranttwurt der erber priester her Liephart von Regenspurkch dietzeit kapplan der Ewigen Mess die ,die, vorgenant fraw Margret gestifft hat auf sand Merten Altar datz sand Stephan ze Wienn und jach mit vorsprechen das daz vorgenant haws dieselb fraw Margret zu derselben seiner Mess geschafft hiet, ee denn Sy die vorgenant geltschuld auf sich entnomen und gepargt hiet, und zaigt des besigelt bewêrt und gelaubhaeftig brieff die darumb vor offem gericht auch gelesen und verhort wurden, und nach der verhorung ward gefragt, waz ein recht wêr Do geviel mit frag und mit urtail es solt der vorgenant her Liephart und all sein Nachkomen Kapplan der egenanten ewigen Mess und daz vorgenant sein haws umb die obgenant chlag und ansprach beruebt und ledig sein und solten furbas darumb nicht mer antwurten Und solt Ich In des mein urchund geben und solten Sy mir darumb mein recht geben Daz habent Sy getan Und des ze urchund gib Ich In den brief versigelten mit meinem Insigel Der Brief ist geben ze Wienn Nach Kristi gepuerd viertzehenhundert jar darnach in dem virden jar des negsten Mitichen vor sand Gilgen tag.

Source Fulltext: Peter Peusquens