Ich Gerdraud in der Lantstraze und ich Engel ir Tochter. und ich Margreth die Rudlin und ich Gadrey ir Tochter und ich Ulreich der Rise und ich Wernhart sein sun und alle unser Erben veriehen und Tun chunt allen den die disen prief lesen oder horent lesen die nu leben oder her nach chumftig sint. das wir mit gesampter hant und mit gutem willen und mit verdach(t)em mute ze der zeit da wir ez wol getun mochten. und mit unser gruntvrowen hant swester Christein ze den zeiten Aptessin ze sand Nicla ze wyenn verchauft haben dem Erbern Manne Chunraden dem Wiltwercher purger ze wyenn und allen sein erben ein viertail eines paumgarten daz da leit in dem paumgarten der da haizzet der Juncherre um sechsthalb phunt phenning wyenner meuntz der wir recht und Redleich gewert sein. da von man dient der vor genanten Aptessin swester Christein oder welche nach ir chunftig wirt alle jar fumf und viertzig Phenning ze Rechtem dienst und nimand nicht mer und durch besser und sicherhait setze wir uns ich Herrant der nefe und ich Ulreich der Rise und ich vorgenante Margreth die Rudlin und alle unser Erben unverschaidenleich dem vorgenanten Chunraden dem wiltwercher und sein Erben fuer das selbe viertail ze Rechtem schirm und gewer und fuer alle ansprach nach des Landes Recht ze Osterrich und der Stat ze Wyenn und geben im dar uber disen prief ze ainem urchund und ze ainem waren gezeug diser sache versigelt mit der vorgenanten Aptessin swester Christein ingesigel die dirre sache zeug ist mit sampt irem ingesigel. Der prief ist gegeben nach Christes geburth dreuzehen hundert jar. dar nach in dem vier und dreizzichstem jar an sand Stephans tag.

Source Fulltext: Peter Peusquens