Den Erbern weisen..dem Burgermaister..und..dem Rat gemain der Stat ze Wyenn Embieten Wir, Ich Dorothe Lienharts von Gfell seligen witibe, und ich Thoman, und ich Liendel, Ier Suene und Kathrey Ier Tochter, unsern dienst. Wir lassen ewr Erberkait wizzen dazz unserr lieben Tochter und Swester Annen der Greusnikcherinn, daz halb haus gelegen hinder dem Newnmarkcht gegen des Fewerschutzen haus ueber gevallen und gesprochen ist ist an Irem vaetterleichen Erbtail ledikleich daz Si daz mag geben oder machen wem Sy wil, und senden eu daz auf wizzentleich mit dem brief, und bitten ewr ersamkait daz Ir die egenante Annen die Greusinkcherinn in ewr Grunt-puech schreibt an unsers lieben wirtes und vatters stat des egenanten Lienharts seligen von Gevell, daz ist allez gentzleich mit unserm willen Mit urkund des briefs versigilt mit meins obgenanten Thomans von Gfell aufgedrukchten Insigel So hab ich obgenante Dorothea und Ich Liendel Ier Sun und ich Kathrey Ier Tochter gebeten den Erbern Martein den Egenburger die zeit ainer des Rates und obrister Spitalmaister ze Krems umb sein aufgedrukchtes Insigel Im und seinen erben an schaden darunder wir uns verpinden mit unsern trewn allez daz steet ze haben daz an dem brief geschriben stet. Der geben ist an sand Bartholomees tag. Anno domini millesimo CCCCo quinto.

Source Fulltext: Peter Peusquens