Ich Jacob der Guenser und ich Hanns der Fuechsel die zeit bayd des Rats der Stat ze Wienn Vergehen und Tun kund offenleich mit dem brif Allen den die In sehent oder horent lesen das fur den Rat der egenanten Stat ze Wienn komen, fraw Elsbet Thomans hawsfraw des Spengler und Ulreichs seligen des Hefendler Tochter an ainem tayl Da engegen kom an dem andern tayl auch fûr den egenanten Rat Junkchfraw Kathrey der egenanten Elsbeten Swester und paten den gantzen Rat unverschaidenleich, das sy In geben zwen aus In des Rats zetaylêrn zue den guetern die In der vorgenant Ir vater Ulreich der Hêfendlêr hinder Im lassen hat Des gab der Rat uns vorgenanten zwen In zue denselben guetern zetailern und haben auch wir mit wolbedachtem muet die vorgenanten gueter under sy Recht und redleich getaylt Also das an derselben taylung der egenanten Guter der vorgenanten frawn Elsbeten Thomans hawsfrawn des Spenglêr mit fûrtzicht und mit los ze rechtem Erbtayl gevallen ist an rechter taylung, Ein weingarten gelegen in der Luerlukchen vor Stubentor in dem griezz, Da engegen ist der vorgenanten Junkchfrawn auch mit fuertzicht und mit los an der vorgenanten taylung zerechtem Erbtayl gevallen das haws gelegen in der Chumpflukchen zenêchst Ulreichs haws des Veyrtags und einen weingarten gelegen bey dem klagpawm zenêchst Seydleins weingarten des kochs Also das yder tayl seinen tayl der egenanten Gueter so Im mit fûrtzicht, und mit los an rechter taylung gevallen ist alsvor ge-schriben stet, Sol furbas, ledichleichen und freileichen haben und allen seinen frumen damit schaffen verchauffen versetzen und geben wem er welle und alled das damit tuen und hanndlen das Im allerpest fuegt oder wolgevellet vor aller irrung Und darnach komen wir wider fur den Rat und sagten da unser chuntschafft von der egenanten taylung wegen als wir zurecht solten Und daruber ze einem warn offem urkund und getzeug geben wir von geschêfft und gehaizz des obgenanten Rats der obgenanten Junkchfrawn Kathrein den brif versigilten mit unser bayder anhangunden Insigilen Der geben ist ze Wienn nach Kristi geburde virtzehenhundert Jar darnach in dem Sechsten Jar an sand Agnesen Tag.

Source Fulltext: Peter Peusquens