Ich, Barbara weylent maister Niklas seligen von Nicolspurg, des Pognêr witib die nu Erharten den Sultzpekchen eleichen genomen hat Bechenne das mi(t)r der erber man Ulreich von Nicolspurg die zeit des Aussern Rats der Stat ze Wienn verricht und betzalt hat Acht phunt wienner phenning An den zwain und dreissig phunden die er mir von meiner kinder wegen Niklasen und Hannsen die noch zu Irn beschaidn jarn nicht komen sind, die ich mit dem vorgenanten meinem erêrn wirt maister Niklasen gehabt han und die mir vor dem Rat gesprochen sind Als der Statbrif weiset den ich darumb han schuldig ist und gelten sol und darumb so sag ich In und sein erben fur mich und fur all mein erben derselben Acht phunt gar und gentzleich quitt ledig und los vor aller ansprach Mit urkund ditz briefes Besigilten mit des obgenanten meins wirts Erharts des Sultzpekchen und hern Rudolffs des Angerfelder zu den zeiten purgermaister ze Wienn bayden aufgedrukchten Insigiln die ich darumb vleizzig gepeten hab dem vorgenanten hern Rudolffen dem Angerfelder an schaden und verpind auch mich mit meinen trewen angever under den egenanten Insigiln alles das stetzehaben das vor an dem brif geschriben stet. Geben ze Wienn am Eritag nach dem Suntag Als man singet Invacavit In der Vasten Anno CCCCmo Sexto.

Source Fulltext: Peter Peusquens