Ich Anna des Utzenhofer seligen Swester vergich und tuen kund allen den die den brief lesent oder horent lesen die nu lebend und hernach kuenftig sind das ich mit gutem willen und mit walbedachtem muet zu der zeit do Ich es wal getûn mocht mich gar und gentzleich vertzigen und fûrtzicht getan hab und vertzeich auch mich wissentleichen mit dem brif gegen dem erbern herren hern Niklasen von Hofingen zu den zeiten kappellan der ewigen Messe die die erber fraw, die Copherswentinn auf unser frawn Altar hintz sand Stephan ze Wienn gestifft hat das mein Swester fraw Margret An irselbs, und an meiner Stat dem selben hern Niklasen verchaufft hat gelegen in dem Chergezzlein ze Wienn zenêchst Maister Hermans haws Chorherr datz sand Stephan ze Wienn Mit der beschaidenhait das ich noch mein erben noch anders ymant von unsern wegen furbas nymermer dhain ansprach noch vodrung haben noch gewinnen noch dhains rechtens darauf iehen sullen weder vil noch wenig in dhainer weys Sunder das der vorgenant her Niklas von Hofingen das egenant haws nach seins chaufbrieffs sag sol furbas ledichleichen und freileichen haben und allen seinen frumen damit schaffen verchauffen versetzen und geben wem er welle und alles das damit tuen und hanndlen das Im allerpest fuegt oder wolgevellet vor aller irrung Wann er mir genueg darumb getan hat Und wann ich selber aigens Insigils nicht haben daruber so gib ich In den brif ze einem warn offem urkund der sach versigilten mit der zwair erbern mann Insigiln Ulreichs des Herwarts zu den zeiten statschreiber ze Wienn und Mertten des hawsleitter purger daselbens die ich des vleizzig gebeten hab das sy der sach getzeuge sind mit Irn Insigiln In an schaden darunder ich mich verpind mit meinen trewn angever alles steet zehaben das vor an dem brif geschriben stet Der geben ist ze Wienn nach Kristi geburde virtzehenhundert Jar darnach In dem Sechsten Jar am Mitichen nach Judica In der Vasten.

Source Fulltext: Peter Peusquens