Wir, Chunrat der Vorlauf, zue den zeiten Purgermaister und bayd Rêt der Inner und der Ausser der Stat ze Wienn Tuen kund, offenleich mit dem brif das uns der erber man Hanns der Mosprunnêr zue den zeiten kirichmaister datz Allerheiligen Tûmkirchen datz sand Stephan ze Wienn gar und gentzleich widerrayt hat von allem Innemen und ausgeben das er das nachst vergangen virtzehenhundertist und das sechts Jar von derselben kirchen und des newen pawes des Tûrns wegen daselbs getan hat, Also das wir des wal emphunden haben das er uns der Stat und gantzer gemayn In, derselben phleg getreuleich erberleich und fruenkchleich mitgefarn hat Des wir Im hinfuer zedankchen haben Und sagen auch In und sein erben derselben Raittungen aller gar und gentzleich quitt ledig und los vor aller ansprach Und ist auch der vorgenant Hanns der Mosprunnêr der egenanten Stat an derselben Raittung schuldig worden drew phunt und zwelf phenning wienner muenzz Mit urkund ditz brifes Besigilten mit der vorgenanten Stat ze Wienn klaynem Anhangundem Insigil Der geben ist ze Wienn nach Kristi geburde virtzehenhundert Jar darnach In dem sibenten Jar am Mitichen nach sand Erharts tag.

Source Fulltext: Peter Peusquens