Wir Chunrat der Vorlauf zue den zeiten Purgermaister und der Rat gemayn der Stat ze Wienn Vergehen und Tun kund, offenleichen mit dem brif das wir den erbern leuten Pauln dem Geyr und Jorgen dem Gruenpekchen, die zeit bayd mit uns gesworn des Rats, Hannsen der noch zue seinen beschaiden Jarn nich komen ist Stephans seligen des Pechrêr Sun mit leyb und allen seinen guetern Erbgutern, und varundguetern wie die genant oder wo die gelegen sind Innerlandes oder Ausserlandes Ingeantwurt und emphalhen haben Also das Si denselben Hannsen mit leib und seinen guetern als vorgeschriben stet, sullen Innehaben mit Jerleicher widerraitung Alslang untz das der egenant Hanns zu seinen beschaiden Jarn chuembt und sich selber verwesen mag Mit urkund ditz brifes den wir In daruber geben Besigilten mit der vorgenanten Stat ze Wienn klainem Anhangundem Insigil. Der geben ist ze Wienn nach kristi geburde virtzehenhundert Jar darnach in dem Sibenten Jar am Phintztag vor dem Suntag Als man singet Judica in der Vasten.

Source Fulltext: Peter Peusquens