Wir Swester Kathrey die Oederinn zu den zeiten Abbtessynn der Geistleichen frawen des klosters datz sand Niclas vor Stubentor ze Wienn und der Convent gemain doselbens vergehen fur uns und unser Nachkomen offenleich mit dem brief, das uns die erbern Mann Hanns der Czirnast und Hanns der Mosprunner die zeit bayd ausrichter und volfurer des gescheffts so Hanns der Arns-torffer dem Got genad getan hat, verrichtet und gewert habent hundert phunt wienner phenning, die uns der egenant Hanns der Arnstorffer geschaft hat, als dasselb geschêft vor dem Rat der Stat ze Wienn mit erber kuntschaft beweysent habent und als es ze einer ewigen gedêchtnuss in dem Statpuech geschriben stet, und sagen auch wir fur uns und unser Nachkomen, die vorgenanten gescheftherren und Ir Erben, der egenanten hundert phunt phenning gêntzleich Quitt ledig und los Mit urkund des briefs versigilten mit unserr obgenanten Swester Kathrein der Oderinn, abbtessynn datz sand Niclas und des Convents doselbens paiden anhangunden Insigiln Der brief ist geben ze Wienn Nach Kristi gepuerd virtzehenhundert jar darnach in dem sibenten jar des freytags in den Quatembern ze Phingsten.

Source Fulltext: Peter Peusquens