Unsern willigen dienst vor wir lazzen ewer weishait wizzen, daz chrieg und stoezz hin oben gewesen sind zwischen dem hannsgrofen, und zwischen dem hantberich, weraittern, lodbe-richern, und webern von unserr Tulner tuech wegen, die selben chrieg und stoezz, sind auz-getragen worden pey unserm Gnedigen Herren Hertzogen Albrechten Seligen dem got gnad, also daz den hannsgrofen und daz hantberich wol wenuegt hat, und auch darumb so ist des ein prief gemacht worden und der ist wesigelt mit unsrer Stat Insigel und darzue so scholt der hannsgrof, Chunrat der Ramppelstorffer auch wesigelt haben. Und darumb so wolt uns unserr gnediger herre Hertzog Albrecht Seliger mit seinem prief auch daz westet haben. Nue hat denselben prief, der egenante Chunrat der Ramppelstorffer noch ynn und chuenden sein von ym nicht wekoemen. Nue pit wir ewer weishait daz Ir den prief zue ewern hannden pringt In den Rat, und swann Ir daz getan habt, So gebt den prief dem hannsgroefen, der yetzund hannsgroff ist Swann wir alles daz goelten haben daz der egenant hannsgroff und all die mit ym hin oben zue Tuln gewesen verzert habent wesigelt mit der Stat ze Tuln Insigel. Richter und der Rat der Stat ze Tuln

Source Fulltext: Peter Peusquens