Ich Leb der Nusdorffer zu Perchtoldstorff und Ich Ann sein hawsfraw Wir vergehen fur uns und fur all unser erben und tuen kunt offenleich mit dem brief umb das haus gelegen in der Sunigerstrazz an dem Ekk zu Wienn zenechst der becherten frawn haus datz sand Jeronymus das wir von Maister Jorgen dem Summann dem pogner und von frawn Kunigunden seiner hawsfrawn gechauft haben nach unsers chaufbrief sag, den Si uns mit der Stat GruntInsigel besigelten darumb gegeben habent . davon haben wir uns gegen den erbern weisen dem Burgermaister dem Richter und dem Rat zu Wienn und Irn nachkomen mit unsern trewn an aydes stat und an alles gever verlubt und verpunden luben und verpinden auch uns gegen In wissentleich mit dem brief das wir oder unser erben ynder den nachsten zwain jaren die nach sand Jorgen tag schirist kunftig nacheinander koment dasselb haus besitzen sullen und mit der Stat daselbs leiden und tullden sullen als ander mitpurger tuent oder sullen es andern erbern leuten verchauffen In derseben frist die mit der Stat leiden und dienn als vor geschriben stet Mit urchunt ditz briefs den wir In daruber Geben ze einem waren offem urchunt der sach besigelten mit unserm Insigel und mit des erbern mann Insigel Hannsen des Poltzleins zu Perchtoldstorf den wir des gebeten haben das er der sach gezeug ist mit seinem Insigel Im an schaden der brief ist Geben zu Wienn nach Krists gepurd virtzehen-hundert jar darnach in dem newnten jar des nachsten Eritags nach sand Scolasticatag der heiligen junkchfrawn.

Source Fulltext: Peter Peusquens