Ich Jacob Chunrats seligen Sun des pewgler, Vergich fuer mich und fuer all mein Erben und tuen kunt offenleich mit dem brief das mich der erber man Ulreich von Nicolspurg, Burger zu Wienn gar und gentzleich verrichtet und betzalt hat der Sechtzehen phunt und zwen und Sechtzig phenning wienner muenzz die mir fur allen meinen tail den Ich an der alten Stichlynn seligen gescheft gehabt hab gegen andern meinen miterben ledichleichen gevallen sind und die derselb Ulreich Ingenomen hat als dasselb gescheft in dem Statpuech zu Wienn geschriben stet und darumb so sag Ich in und sein Erben fuer mich und fuer all mein erben derselben Sechtzehen phunt und zwen und Sechtzig phenning gar und gentzleich quitt ledig und los vor aller ansprach Mit urchund ditz briefs versigelten mit der zwayr Erbern mann Insigeln hern Pauln des Geyrs dietzeit des Rats der Stat zu Wienn und hern Ulreichs des Herwarts dietzeit Statschreiber zu Wienn die Ich des gepeten han das Si der sach getzeugen sind mit Irn aufgedrukchten Insigeln In an schaden wann Ich selber aigens Insigels nicht hab Geben zu Wienn an phintztag nach sand Kathrein tag Anno etc. CCCCmo Nono.

Source Fulltext: Peter Peusquens