Georius dei et apostolice Sedis gracia Episcopus Pataviensis . Dilecto in christo .. Magistro Chori collegiate Ecclesie sancti Stephani, alias omnium sanctorum Wyennensis vel eius locum tenenti nostre diocesis. Salutum in domino. Quia ad perpetuam missam per quondam Thomam Payr, ex novo dotatam et testatam, celebrandam super altari duodecim Apostolorum in dicta Ecclesia sancti Stephani situato, dilectum in christo Nicolaum Abban presbyterum dicte nostre diocesis, ad presentacionem honestorum virorum Thome Smukker et Conradi Abban, Opidanorum dicti Opidi Wiennensis, ad quos presentacio dicte Misse, de consensu et bona voluntate proximiorum consa(n)guineorum dicti Thome Payr, testatoris, pertinere dinoscitur, Rectorem instituimus per presentes Ipsumque per librum, ut moris est, investivimus presentialiter de eadem, curam, administrationem spiritualium et temporalium dicte Misse, ei tenore presentium committentes. Quare tibi in virtute sancte obedientie precipimus firmiter et mandamus, quatenus eundem Nicolaum, in corporalem possessionem. memorate Misse, ac omnium iurium et pertinenciarum ipsius inducas, ac inductum defendas, faciensque sibi de fructibus, redditibus, proventibus, iuribus et obvencionibus universis, ad ipsam Missam spectantibus, ab omnibus, quorum interest, integre responderi, Contradictores et rebelles, auctoritate nostra, per censuram ecclesiasticam firmiter compescendo. Datum Wyenne XXIIII die Mensis februarii Anno domini Millesimo Quadringentesimo Decimo.

Source Fulltext: Peter Peusquens