Ich Wentzlaw Hewgel, Burger der alden Stat zu Prage, Bekenne offentlich mit disem brive, allen die In sehen oder hoeren lesen, das ich mich, mit hern Hansen Wuerffel, von Radawn, gantz und gar, und fruentlichen vorricht hab, von zuspruchs wegen etliches geldes, und schulde, die ich zu Im gehabt habe, von meynes bruders Pauls wegen, dem got genedig sey. Und dovon, sage ich, den egenanten hern Hansen Wuerffel, desselben geldes und derselben schulde, gantz und gar, quitt ledig und los fuer meyne geswisterheit und fuer alle meyne brueder, von der wegen Ich mich der sache hatte angenomen. und fuer alle gemeyniclich Mit urkunde ditz brives vorsigelt mit meym angedruktem Insigel. Auch zu eyner bessern zeugnuesse und sicherheit hab ich gebeten, die erbern und weisen, Lewtel Czwirner, und Niclas von Sar, Burger doselbest zu Prage, das sie ire Insigel angedrukt haben, an disen brieff, yn und iren Erben an schaden, der do geben ist zu Prage noch Cristes gebuerd viertzehenhundert Jar, und dornach, in dem czehenden Jare, des nehsten donerstag vor sand Joergen tage.

Source Fulltext: Peter Peusquens