Johannes episcopus servus servorum dei. Dilectis filiis .. Consulibus et Scabinis Opidi Vyennensis, Salutem et apostolicam benedictionem. Divine providentie dispositio et inscrutabilis scientiarum domini altitudo non humanum attendens iuditium, sed sola sui disponens scientia universa, ecclesiam sanctam suam crebra plerumque decedentium mutatione pastorum visitat, ac nove prolis successione reformat, prout ex trono sue ineffabilis maiestatis, in cuius manu celum et terra consistunt, conspicit expedire. Cum itaque, nuper superna disponente clementia, in partem solicitudinis prefate ecclesie, post exequiarum expleta solemnia felicis recordationis Alexandri V. predecessoris nostri, Quartodecimo die instantis mensis, iuxta morem a venerabilibus fratribus nostris eiusdem ecclesie Cardinalibus, de quorum numero tunc eramus, discrepante nemine, decimaseptima ipsius mensis licet insufficientibus meritis fuerimus evocati, devotioni tue id duximus ad vestri letitiam cordis presentibus intimandum. Licet enim Dominus Deus noster suo nutu celestia simul, et terrena gubernans cunctis Christicolis nos constituerit in specula pre-eminentie pastoralis ad regendam ecclesiam sanctam suam . devotionem tamen prefatam tan-quam intimam et precordialem filiam recognoscimus specialiter nostre solicitudini ab intimis commendatam. Nam pro statu et honore prefate ecclesie, ac ipsius tranquillitate pace, et unione totius gregis fidelium ipsa devote agere profutura semper vestris saluberrimus (curis saluberri-mis), ac singularis vigilantie studiis non destitit, vel desistit. Ad quorum prosecutionem pervigilem fructu condigne recompensationis, et glorie, etiam apud supernorum munerum largitorem minime carituram, devotionem eandem paternis affectibus exhortamur. De nobis autem, qui dum minori fungebamur officio, eandem devotionem, precipua semper affectione dileximus fiduciam volumus obtinere, quod ipsam deinceps continebimus in intimis visceribus cordis nostri, de vestris, ac vestrorum commodis, statu, gloria, pariter, et honore, prout inspirabit altissimus, paterna soli-citudine iugiter cogitantes. Super quibus, et nonnullis aliis statum nostrum, et prefate ecclesie, ac fidelium tranquillitatem concernentibus, dilectos filios Magistros Antonium de Montecatino et Jacobum de Vivianis de Luca Iegum doctores Nuntios, et familiares nostros, de paterna nostra intentione circa premissa plenarie informatos ad eandem devotionem destinare providimus, quorum relatibus adhibere placeat credentie plenam fidem. Datum Bononie VIII kal. Junii Pontificatus nostri Anno Primo. Jo. de Crivellis.

Source Fulltext: Peter Peusquens