Ich Jorig der Stuchs von Trawtmanstorff Bekenne mit dem gegenwurttigen brief das fur mich komen die erbernn knecht Hanns und Niclas gebrueder die Schekrêr und batten mich das Ich In und Iren erben Suenen und Tochtern geruechet zuverleichen die hernach geschriben gult und nuetze mit allen Ieren zuegehorungen Item acht gelts und Sybentzehenttalb wienner alles gelegen ze Sarestorff und zu Stuchsen Newsidel auf behaustem und auf uberlendt vanne dieselben gult und nuetze von mir zu lehen ruerent von der hersch(aft) ze Trawtmans(torf) das han Ich getan und habe denselben Schêkreren und allen Ieren erben Sunen und Tochtern die vorgeschriben gult und nuetze mit sampt Ieren zuegehorungen verlichen und leiche In auch die wissentlich mit chraft dus brieves was Ich In zu recht daran leichen sol oder mag Also das Sy die Nu furbass von mir und meinen erben In lehens Rechten Innehaben sulen und mugen ze nuetzen und ze nyessen als soliches Lehens und des Lanndes zu Osterreich Recht ist doch mir und meinen erben an der lehenschaft unvergriffentlichen Mit urchunde dits briefs besigelten mit meinem anhangandem Insigill Geben ze Trawtmanstorff Noch Kristi gebuerde viertzehenhundert jar darnach in dem zehendtem jare des pfintztags nach Sant Michels tage.

Source Fulltext: Peter Peusquens