Ich Wolfhard Pilich vorgich offenleich mit dem brief das mich der Erberr herr her Erhart der Schierl, Chorherr ze aller heiligen Tuemkirichen datz sannd Stephan ze Wyenn und Pharrer ze Napperstoriff und dye erbern weisen her Wolfgang der Purkchartzperger des Rats der Stat ze Wyenn und Hainreich der Starkch von Sparbach auch purger ze Wyenn zu den zeiten all drey ausrichter und volfuerer des geschaeffts so her Leonhart der Schawer weilent lerer geistleicher rechten dem got genad getan hat voerrichtet und gewêrt habent Czwayntzikch phunt wienner phenning die mir derselb mein herr her Leonhart der Schawer geschafft hat nach seins geschêfft-brief sag. Und sag auch ich fuer mich und fuer all mein Eriben dye vorgenanten drey Geschaefft-herren und ir Eriben der egenanten Czwaintzikch phunt phenning gentzleich Quitt ledig und los Und wann ich selben aygen Insigel nicht hab darumb gib ich fuer mich und fuer all mein Eriben In den brief zw einem waren urkund der sach vorsigelten mit der zwaier erbern mannen Insigiln Jorgen des Newer und Wolfharts des Pirichner paid purger ze Wyenn die ich des fleizzigleich gepeten hab das Si der sach getzeugen sind mit Irn aufgedrukchten Insigeln In an schaden darunder ich alles des vorgich und bekenn das vor an dem brief geschriben stet der geben ist ze Wyenn nach Kristi gepurt viertzehenhundert Jar und darnach in dem aindleften Jar des nagsten Sambtztags vor sannd Jorgen tag.

Source Fulltext: Peter Peusquens