WIR Jacob von Hoye, Amptman des Hertzzgn (sic) Albrechts von Oesterriche, Richter ze wienn und der Rat von der Stat ze wienn, wir tuon chunt an disem briefe, allen den die disen brief lesend, oder hoernt lesen, Die nu lebent und die her nach chuenftic sint, daz dem erbern manne vor uns ertailt war mit gemein rate, hern Liupolde auf der Hochstrazze, Daz er alles daz guot, daz sins Oehaims Chunrat Springinzoels und sinr hausfrawen Elspetn was, ez wer perchrecht oder purchrecht, oder varnt guot, daz er daz lediche verchauffen oder versetzzn solde an alle ansprache umb diu purgelschafft, da her Liupolt umb purgel was worden fuer sinen Oechaim Ch. kegen unsrm Hern dem Herzzogn Albrecht von Oesterriche umb zwai hundert phunt und umb fuemf und zweinzich phunt wienner phenning. Da her Liupolt sein Oechaim Ch. umb ouz der selben vanchnuesse nam, und bewert auch daz vor uns her Liupolt in dem Rat mit seins Ochaims Ch. Insigel und brief, und auch mit zwain erbern mannen, hern Liupolt Leublin, und mit Dietriche hern Nortprechts sun, die daz sagten, daz Ch. Springinzole, und sin housfrauwe Elspet, dem vorgenanten Liupolt allez daz geben hetn mit gutm willen, daz sie an perchtrecht oder an purchrecht oder an varndem gut heten, daz er daz verchuffen oder versetzzn solde an alle ansprache, und sich und siu loesn solde damit von der puerglschafft kegen unserm Hern dem Hertzzogn Albrecht von Oesterrich. Desselben guots hat her Liupolt der vorgenant verchauft, einn wingarten, der Ch. und seiner hausfrawen was, der ze der hilign Stat ligt uf der Laimgruob, umb sibenzic phunt wienner phening, hern Uozzmann und hat ouch in der gar gewert, und hat ouch im hern Uozzman den selben weingarten ufgeben vor dem rechtn perchherren hern Dietmar von der hiligen Stat. Und ist ouch her Livpolt, der vor genant vor uns in dem Rat wordn desselbn wingartn rechter schern (sic) fur alle ansprache, also der Stat und des Landes recht ist. Dar ueber geben wir disen brief zu einer ewigen Sicherheit versigelt mit der Stat Insigel. Do diser brief geben ist, do was von Christes geburt Tousnt iar, zwai hunder iar und in dem ain und neunzigisten jar (in dem monen december an sant clementen tag.)

Source Fulltext: Peter Peusquens