Wir Albrecht von gotes gnaden Hertzog ze Oesterreich, ze Steir, ze Kaernden, und ze Krain, Graf ze Tirol etc. Embieten unsern lieben .. allen unsern undertanen, und getrewn, geistleichen und werltleichen, wie die genant, oder wa die gesessen sind, die weingarten in dem puerkfrid, zu Wienn, und darumb inner einer Rast wegs habent, unser gnad, und alles guet. Wan durch gmainns nutzes, und frumens willen ein ordnung gemacht, und verschriben ist, wie nu hinfur, das wein-gartpau, daselbs, gehalten, und gehandelt sull werden, als man das offenleich berueffen wirdt, die uns auch wol gevellt. Empfelhen wir ew allen, und ewr yecleichem besunder, und wellen gar ernstleichen, daz Ir dieselb ordnung, als man die, denn berueffen wirdt, hinfuer also, gêntzleich haltet, und dawider nicht tuet, Das mainen wir. Geben ze Melk an Samstag, nach Sant Bartlmees tag. Anno domini etc. Quadringentesimo Duodecimo d. d(ux) in cons(ilio)

Source Fulltext: Peter Peusquens; siehe auch: • Tomaschek, Rechte und Freiheiten 2, S. 18 n°115