Wir der Rad zu Franckenfurd Erkennen uffenlichen mit dissem brieffe das vur uns kommen ist ein erber kauffman genant Brune von Lechnich burger zu Colne und hat gantze mogde und voll gewalt gegeben Gerhard von Gerhartzhoffen auch burger zu Colne solich hus mit siner zugehorunge als er ligende habe, in der Stat zu Wyene das etzwan were Hans Hasenbalcks des fleischheckers, und darzu auch alle andere Eigen und erbe unde ligende gude. Es sin wingarten husere oder wilcherlej Eigen, oder erbe oder ligende gude das anders ist, als er ligende habe in Ungern und in Osterrich, wo die daInne gelegen oder wie die genant sin, nichtis daran ußgenommen. Also das der selbe Gerhard von des vorgenanten Brunen und siner erben wegen, und an ir stat, das vorgenante Eigen und erbe unde ligenden gude semptlich oder besundern sal und mag verussern verkeuffen und verwenden an allen den gerichten und enden da des noit sin werdet und damyde zutun und zulassen zu glicher wise als er selber damyde tun und lassen mochte, obe er daby geinwertig were. Und des zu urkunde so han wir der Rad zu Franckenfurd vorgenant der vorgenanten unser stede Ingesigel an dissen brieff tun hencken Datum Anno domini millesimo quadringentesimo tredecimo in vigilia Palmarum.

Source Fulltext: Peter Peusquens