Wir Rudolf der Angêrvelder zue den zeiten Burgêrmaistêr, und der Rat gemain der Stat ze Wienn. Bekennen offenlichen mit dem brief umb die drew hundert phund wienner phenning, die der Erwirdig herr, her Lienhart selig der Schawr weilent lêrer in geistlichen rechten, und Official des hofs ze Passaw hintz unser frawn auf der Stetten ze Wienn in die Nêw kapelln zenêchst des .. Bischofs hof von passaw von seinen puechêrn zue ainer ewigen mess ze stifften geschaft hat, der wir nach seins geschêftbrief lauttung Recht lehenherren sein, daz der erber herr her Erhart der Schiêrl Tuembherr ze Freysing und datz Sand Stepfan ze Wienn und pfarrer ze Naperstorf und die erbêrn weisen her Wolfgang der Purckhartsperger diezeit StatRichter ze Wienn her Paul der Geyr unser mitgesworen und Hainreich der Starck von Sparbach unser mitburger, all vier ausrichter und volfuerer des geschêfts So der vorgenant her Lienhart der Schawr getan hat, die vorgenanten drew hundert phund an dienst auf der Deutschen herren dorff gelegt habent, gelegen in Sand Aitten pfarr, genant Seitzestorff und auf alle die und dartzu gehoert nach des briefs sag, den die vorgenanten Deutschen herren derselben ewigen Mess, darumb gegeben habent, denselben brief uber das vorgenant dorff und was dartzue gehoert, und auch den Stifftbrief uber des vorgenanten hern Lienharts des Schawrs zwo Mess uns die vorgenanten geschêfftherren ingeantwurt und gegeben habent Und darumb sagen wir dieselben geschêftherren, der egenanten dreyr hundert phund und der vorgenanten brief gêntzlichen quit ledig und los vor aller ansprach Mit urchund ditz briefs. Geben ze Wienn an Eritag vor Sand Laurentzen tag Nach Christi gepuerd vierzehen-hundert Jar darnach jn dem dreyzehendem Jare.

Source Fulltext: Peter Peusquens