Wir Ruedolff der Angervelder zue den zeiten Burgermaister und Muennssmaister. Und der Rat gemain der Stat zue Wienn. Bechennen das uns der erber man Jorig der Newer unser mitburger gar und gentzleich yngeantbuert und geben hat alle die brief wie die genant sind die uber die kapplaney gehorent die Jorig selig der Nusdorffer hintz Allerheilligen Tumkyrchen hintz sand Stephann zue Wienn gewidemt und gestift hat nach seins gescheftbriefs sag den er darumb hinder Im lassen hat, und der wir, nach desselben gescheftbriefs sag Recht lechenherren sein, und darumb so sagen wir den egenanten Jorgen den Newer und sein erben der egenanten brief aller als vorgeschriben stet gar und gentzleich quitt ledig und los vor aller ansprach Mit urchund ditz briefs Besigelt mit der vorgenanten Stat zu Wienn aufgedrukchtem Insigel Geben zue Wienn an montag nach sand Erasms tag Anno domini etc. CCCCmo XIIII°

Source Fulltext: Peter Peusquens