Ich Niclas der Rosenawer ze Otakchrynn Ich Kathrey sein hawsfraw und all unser erben. Bekennen offenleich mit dem brief. das wir unverschaidenleich gelten sullen. Dem erbern priester hern Mathesen Capplan der Cappellen unser frawn ze Hietzing seinen Nachkomen und derselben Cappellen. Viertzig phunt wienner phenning. die uns der benant her Mathes durch trew und fuedrung willen berayt gelihen hat, der wir Sy oder wer uns an Irer stat mit dem brief mont unvertzogenleich ausrichten und betzaln sullen an sand Joergen tag der schierist kuempt. Und durch pesserr sicherhait haben wir In dafuer ze phannt gesatztt mit guetem willen mit wolbe-dachtem muet und mit gesampter hannd zu der zeit do wir es wol getuen mochtten. und mit hannden des erbêrn Hainreichs von Strasburg zu den zeiten amptman des chlosters ze Newnburg, unsern weingarten gelegen daselbs ze Otakchrynn in der Ertprust des ein halbs jeuch ist zenechst Niclass weingarten des Edelpartz. Doman von dem egenanten unserm weingarten alle jar dient dem vorgenanten chloster ze Newnburg fuenf viertail wein ze perkrecht und drey phenning ze voitrecht und nicht mer. Mit der beschaidenhait Ist das wir oder unser erben den vorgenanten hern Mathesen oder sein nachkomen und auch die egenanten Cappellen ze Hyetzing oder wer uns an Irer stat mit dem brief mont des vorgenanten Ires gelts nicht ausrichtten und betzaln auf den tag so vorgeschriben stet. So ist das unser guetleicher will und sullen auch Sy denn furbas vollen gewalt und Recht haben mit dem vorgenanten unserm weingarten Irm phannt, allen Iren frumen ze schaffen mit verchauffen oder mit versetzen wem Si wellen an allen Irrsal. Soverr das Si des vorgenanten gelts alles und was Si des schaden nement ze Kristen und ze Juden oder wie der schad genant ist, den Ir ainer oder wer uns an Irer stat mit dem brief mont ungesworn gesprechen mag, gantz und gar davon verrichtet und gewert werden. Und was In hawptguets und schadens an demselben phannt abget das sullen Si haben datz uns und unsern erben unverschaidenleich und auf allem andern unserm guot das wir haben in dem lannde ze Oesterreich oder wo wir es haben, Es sey erbguet oder varund guet wie das genant ist. wir sein lebentig oder tod. Wir sein auch des-selben phannts Ir Rechtt gewern und scherm fur alle ansprach, nach des pergs und des lanndes Recht ze Oesterreich. Und darueber so geben wir fur uns und fur all unser erben In den brief zu einem warn uerchunt der sach versigelten mit mein ogbenanten Niclass des Rosenawer anhan-gunden Insigil. und mit des obgenanten Amptmans des erbern Hainreichs von Strasburg auch anhangunden Insigil. Und wan Ich obgenante Kathrey die Rosenawerynn selber nicht aygen Insigil hab. So verpind ich mich mit meinen trewn angevêr under den egenanten zwain Insigiln alles das stêt ze haben das vor an dem brief geschriben stet. Der geben ist ze Wienn Nach Kristi gepuerd viertzehenhundert Jar darnach in dem viertzehenten Jar, des nêchsten Montags nach der Heyligen Aindlef Tawsent Magt tag.

Source Fulltext: Peter Peusquens