Ich Anna Fridreichs von Hierrsaw Burger ze Wienn eleiche hausfraw Bechenn offennleich mit dem brief, daz ich mit gueten willen und mit wolbedachten muet zu der zeit da ich es wol getuen mochtt Mich vertzigen und furtzicht getan hab und vertzeich auch mich Rechtt und Redleich mit dem brief, der ubertewrung des hoffs gelegen ze Nusdorf der weilent meins erern wierts Niclass des Wuerffels seligen gewesen ist nach sag und laut des Geschêffts daz mir derselb mein wiert Niclas der wurffel seliger darauf getan hat als es in dem Statpuech ze Wienn geschriben stet. Also beschaidenleich daz ich noch ander yemant von meinenwegen furbas auf die ubertewrung des vorgenanten hoffs nymmermer chain ansprach noch vadrung nicht haben noch gewinnen sol weder mit worten noch mit werchen in chainerlay weis. Daz gelob Ich stêttzehaben und zevolfurn mit meinen trewn angevêr. Und daz die fuerzicht und Sach furbaser also stêt und untzebrochen beleib. Und wann ich egenante Anna selber nicht aigen Insigel hab. daruber So gib ich den brief zu einem warn urchund der Sach versigelten mit des obgenanten meins Eleichen wierts Fridreichs von Hierssaw anhangundem Insigel. Und mit des erbern Mannes Insigel Larentzs des Holtzkeuffels, Burger ze Wienn den ich des vleizzichleich gepeten hab daz er der Sach getzewg ist mit seinem anhangundem Insigel In an schaden. Auch verpind ich mich obgenante Anna mit meinen trewn angevêr under den egenanten Insigeln alles daz stêttzehaben daz vor an dem brief geschriben stet. Der geben ist ze Wienn, an freitag vor sand Lutzein tag Nach Kristi geburd viertzehen-hundert jar dar nach in dem viertzehendem jare.

Source Fulltext: Peter Peusquens